god mein zarraat ki sar apna rakh kar so gaya

god meñ zarrāt kī sar apnā rakh kar so gayā

pyaas kī dahlīz par dariyā kā manzar so gayā

kuchh nazar aatā nahīñ ā.īna-e-ayyām meñ

aks-e-hairat jaag uThā ḳhvāboñ kā paikar so gayā

dard ko darmāñ banāne kā hunar rakhtā thā vo

oḌh kar jo vaqt kī ḳhush-rañg chādar so gayā

jis kā rishta thā jahān-e-āgahī ke karb se

vo payām-e-amn kā haamī kabūtar ho gayā

ham hī ġham-ḳhvār-e-tamannā the na so.e sub.h tak

jab dar-o-dīvār ko niiñd aa ga.ī ghar so gayā

ḳhaak uḌtī hai sar-e-sahn-e-tamannā chaar sū

dīdanī jo kuchh bhī thā manzar-ba-manzar so gayā

ahd-e-nau ne tābish-e-husn-e-rifāqat chhīn lī

qarya-e-jāñ meñ mohabbat kā samundar so gayā

mausam-e-saffāk ne vo sub.h raushan kī hai 'nāz'

qatra-e-shabnam sar-e-shāḳh-e-gul-e-tar so gayā

god mein zarraat ki sar apna rakh kar so gaya

pyas ki dahliz par dariya ka manzar so gaya

kuchh nazar aata nahin aaina-e-ayyam mein

aks-e-hairat jag uTha KHwabon ka paikar so gaya

dard ko darman banane ka hunar rakhta tha wo

oDh kar jo waqt ki KHush-rang chadar so gaya

jis ka rishta tha jahan-e-agahi ke karb se

wo payam-e-amn ka hami kabutar ho gaya

hum hi gham-KHwar-e-tamanna the na soe subh tak

jab dar-o-diwar ko nind aa gai ghar so gaya

KHak uDti hai sar-e-sahn-e-tamanna chaar su

didani jo kuchh bhi tha manzar-ba-manzar so gaya

ahd-e-nau ne tabish-e-husn-e-rifaqat chhin li

qarya-e-jaan mein mohabbat ka samundar so gaya

mausam-e-saffak ne wo subh raushan ki hai 'naz'

qatra-e-shabnam sar-e-shaKH-e-gul-e-tar so gaya