گوشہ‌ نشین لا مکاں وہم و خیال میں بھی آ

گوشہ‌ نشین لا مکاں وہم و خیال میں بھی آ

عالم ممکنات بن امر محال میں بھی آ

جلوۂ زلف و رخ لئے چشم خیال میں بھی آ

شام فراق میں بھی رہ صبح وصال میں بھی آ

ماہ و شفق کی شکل میں شان جمال بھی دکھا

صورت برق مضطرب شان جلال میں بھی آ

صفت ابر چرخ سے فرش پہ ہو گہر فشاں

بام عروج سے کبھی دور زوال میں بھی آ

حسن مجاز کی طرح آ کے مرے خیال میں

ہستیٔ بے مثال تو رنگ مثال میں بھی آ

عالم کیف و رنگ سے توڑ نہ ربط باہمی

رنگ نشاط میں بھی رہ کیف ملال میں بھی آ

جیسے مصورؔ آپ ہیں نقش تصور حسیں

اے میرے حرف دل نشیں صورت حال میں بھی آ