gosha-nashin hain anjuman-ara nahin hain hum

gosha-nashīñ haiñ anjuman-ārā nahīñ haiñ ham

lekin ye mo.ajiza hai ki tanhā nahīñ haiñ ham

jab se milī hai daulat-e-irfān-o-āgahī

duniyā meñ rah ke shāmil-e-duniyā nahīñ haiñ ham

mushkil nahīñ hai dosto tasḳhīr-e-kā.enāt

afsos bas isī kā hai yakjā nahīñ haiñ ham

fardā kā ḳhvāb vaqt kī āvāz haiñ janāb

ik yādgār-e-ahd-e-guzishta nahīñ haiñ ham

hāsil hai ham ko lazzat-e-tauba ḳhatā ke baad

behtar hai aadmī haiñ farishta nahīñ haiñ ham

shādāb hai hamīñ se tirā gulshan-e-vajūd

dariyā haiñ jān-e-ārzū sahrā nahīñ haiñ ham

gosha-nashin hain anjuman-ara nahin hain hum

lekin ye moajiza hai ki tanha nahin hain hum

jab se mili hai daulat-e-irfan-o-agahi

duniya mein rah ke shamil-e-duniya nahin hain hum

mushkil nahin hai dosto tasKHir-e-kaenat

afsos bas isi ka hai yakja nahin hain hum

farda ka KHwab waqt ki aawaz hain janab

ek yaadgar-e-ahd-e-guzishta nahin hain hum

hasil hai hum ko lazzat-e-tauba KHata ke baad

behtar hai aadmi hain farishta nahin hain hum

shadab hai hamin se tera gulshan-e-wajud

dariya hain jaan-e-arzu sahra nahin hain hum