ghubar banta hun KHud ko uDa ke uThta hun

ġhubār bantā huuñ ḳhud ko uḌā ke uThtā huuñ

safar kā āḳhirī manzar banā ke uThtā huuñ

abhī maiñ joḌne vaalā huuñ do-jahānoñ ko

kināre un ke barābar meñ lā ke uThtā huuñ

zarā ruko ki abhī sunñe vaale sunte haiñ

bas ek āḳhirī qissa sunā ke uThtā huuñ

abhī to raat mire ird-gird baiThī hai

ise maiñ nūr-e-sahar se milā ke uThtā huuñ

sitāre sunte haiñ ik inhimāk se is ko

fasāna-e-ġham-e-hijrāñ sunā ke uThtā huuñ

ye mo.ajiza bhī mirī aañkh ko atā huā hai

maiñ sūkhī ret se dariyā banā ke uThtā huuñ

zamīñ pe kab se bhaTaktī hai ḳhilqat-e-tīra

charāġh huuñ ise rasta dikhā ke uThtā huuñ

ghubar banta hun KHud ko uDa ke uThta hun

safar ka aaKHiri manzar bana ke uThta hun

abhi main joDne wala hun do-jahanon ko

kinare un ke barabar mein la ke uThta hun

zara ruko ki abhi sunne wale sunte hain

bas ek aaKHiri qissa suna ke uThta hun

abhi to raat mere ird-gird baiThi hai

ise main nur-e-sahar se mila ke uThta hun

sitare sunte hain ek inhimak se is ko

fasana-e-gham-e-hijran suna ke uThta hun

ye moajiza bhi meri aankh ko ata hua hai

main sukhi ret se dariya bana ke uThta hun

zamin pe kab se bhaTakti hai KHilqat-e-tira

charagh hun ise rasta dikha ke uThta hun