ghubar-e-dard mein rah-e-najat aisa hi

ġhubār-e-dard meñ rāh-e-najāt aisā hī

rahā hai koī mire saath saath aisā hī

to bhuul paane meñ dushvāriyāñ bahut hoñgī

kiyā hai pyaar had-e-mumkināt aisā hī

baras guzar ga.e us se judā hue lekin

ajiib bain hai mauj-e-furāt aisā hī

use bhī os meñ Duubā huā lagā thā badan

mujhe bhī kuchh huā mahsūs raat aisā hī

maiñ jis se ḳhauf-zada thā shurūa se āḳhir

tamāshā kar ga.ī ye kā.enāt aisā hī

koī bhī rañg mayassar na aa sakā to phir

qubūl kar liyā rañg-e-hayāt aisā hī

ghubar-e-dard mein rah-e-najat aisa hi

raha hai koi mere sath sath aisa hi

to bhul pane mein dushwariyan bahut hongi

kiya hai pyar had-e-mumkinat aisa hi

baras guzar gae us se juda hue lekin

ajib bain hai mauj-e-furaat aisa hi

use bhi os mein Duba hua laga tha badan

mujhe bhi kuchh hua mahsus raat aisa hi

main jis se KHauf-zada tha shurua se aaKHir

tamasha kar gai ye kaenat aisa hi

koi bhi rang mayassar na aa saka to phir

qubul kar liya rang-e-hayat aisa hi