ghubar-e-ehsas-o-pesh-o-pas ki agar ye barik tah haTaen

ġhubār-e-ehsās-o-pesh-o-pas kī agar ye bārīk tah haTā.eñ

to ek pal meñ na jaane kitne zamānoñ ke aks thartharā.eñ

ḳhizāñ agar apnā ḳhuuñ na baḳhshe to fasl-e-gul kaise surḳh-rū ho

sukūt apnā jigar na chīre to kaise jhankār deñ sadā.eñ

bikhar chale haiñ bikhar chuke haiñ gul-e-ibārat ke barg-reze

kitāb-e-jāñ kī shahādatoñ kā varaq varaq le ga.iiñ havā.eñ

huā kī be-rañg taḳhtiyoñ par sadā kī tahrīr kyā ubhāreñ

sukūt ke be-nishāñ khañDar meñ charāġh-e-āvāz kyā jalā.eñ

ye shauq kī be-nasīb kaliyāñ ye dard ke be-ḳhizāñ shagūfe

tumhāre qadmoñ meñ rakh na paa.e to kis kī chaukhaT pe jā girā.eñ

havā kī talvār chal rahī ho to shāḳh-e-ummīd kyā sambhāleñ

badan kī dīvār gir rahī ho to dil kī dīvār kyā bachā.eñ

tamāshā-gāh-e-tarab-nishāñ meñ sabhī ko lāzim hai muskurānā

jo ġham-faroshī na karnā chāheñ vahī yahāñ baḳht āzmā.eñ

muhīb rātoñ meñ Dagmagāte dukhī badan ke musāfiroñ ko

akele-pan meñ Darā rahī hai samay ke jañgal kī saa.eñ saa.eñ

tamām alfāz mar chuke haiñ tamām ahbāb jā chuke haiñ

ga.ī rutoñ ke sitam kā qissa sunā.eñ kaise kise sunā.eñ

ghubar-e-ehsas-o-pesh-o-pas ki agar ye barik tah haTaen

to ek pal mein na jaane kitne zamanon ke aks thartharaen

KHizan agar apna KHun na baKHshe to fasl-e-gul kaise surKH-ru ho

sukut apna jigar na chire to kaise jhankar den sadaen

bikhar chale hain bikhar chuke hain gul-e-ibarat ke barg-reze

kitab-e-jaan ki shahadaton ka waraq waraq le gain hawaen

hua ki be-rang taKHtiyon par sada ki tahrir kya ubhaaren

sukut ke be-nishan khanDar mein charagh-e-awaz kya jalaen

ye shauq ki be-nasib kaliyan ye dard ke be-KHizan shagufe

tumhaare qadmon mein rakh na pae to kis ki chaukhaT pe ja giraen

hawa ki talwar chal rahi ho to shaKH-e-ummid kya sambhaalen

badan ki diwar gir rahi ho to dil ki diwar kya bachaen

tamasha-gah-e-tarab-nishan mein sabhi ko lazim hai muskurana

jo gham-faroshi na karna chahen wahi yahan baKHt aazmaen

muhib raaton mein Dagmagate dukhi badan ke musafiron ko

akele-pan mein Dara rahi hai samay ke jangal ki saen saen

tamam alfaz mar chuke hain tamam ahbab ja chuke hain

gai ruton ke sitam ka qissa sunaen kaise kise sunaen