ghubar-e-nur hai ya kahkashan hai ya kuchh aur

ġhubār-e-nūr hai yā kahkashāñ hai yā kuchh aur

ye mere chāroñ taraf āsmāñ hai yā kuchh aur

jo dekhā arsh-e-tasavvur se bārhā sochā

ye kā.enāt bhī aks-e-ravāñ hai yā kuchh aur

maiñ kho.e jaatā huuñ tanhā.iyoñ kī vus.at meñ

dar-e-ḳhayāl dar-e-lā-makāñ hai yā kuchh aur

firāq-e-umr kī had kyuuñ lagā.ī hai us ne

mirā vajūd hī us ko girāñ hai yā kuchh aur

azal se tā-ba-abad jast ek saa.at kī

yahī bas arsa-e-kār-e-jahāñ hai yā kuchh aur

ghubar-e-nur hai ya kahkashan hai ya kuchh aur

ye mere chaaron taraf aasman hai ya kuchh aur

jo dekha arsh-e-tasawwur se barha socha

ye kaenat bhi aks-e-rawan hai ya kuchh aur

main khoe jata hun tanhaiyon ki wusat mein

dar-e-KHayal dar-e-la-makan hai ya kuchh aur

firaq-e-umr ki had kyun lagai hai us ne

mera wajud hi us ko giran hai ya kuchh aur

azal se ta-ba-abad jast ek saat ki

yahi bas arsa-e-kar-e-jahan hai ya kuchh aur