ghubar-e-rah mein samt-e-safar usi se mili

ġhubār-e-rāh meñ samt-e-safar usī se milī

vasīla koī ho manzil magar usī se milī

dil-o-nigāh ko āfāqiyat bhī dī us ne

mire hunar ko ziyā-e-hunar usī se milī

na chhoḌā haath se dāmān-e-'azmat-e-aslāf

mujhe bulandī-e-zauq-e-nazar usī se milī

bharosā mujh ko thā maañ baap kī du'āoñ par

yaqīn kījiye dastār-e-sar usī se milī

jise sharīk-e-ġham-e-zindagī banā na sake

tamām 'umr ko ye chashm-e-tar usī se milī

tamām raat guzārī ḳhayāl meñ jis ke

sahar huī to hamārī nazar usī se milī

bulandiyāñ mire qadmoñ ko chūmtī haiñ 'atīq'

magar ye quvvat-e-parvāz-e-par usī se milī

ghubar-e-rah mein samt-e-safar usi se mili

wasila koi ho manzil magar usi se mili

dil-o-nigah ko aafaqiyat bhi di us ne

mere hunar ko ziya-e-hunar usi se mili

na chhoDa hath se daman-e-'azmat-e-aslaf

mujhe bulandi-e-zauq-e-nazar usi se mili

bharosa mujh ko tha man bap ki du'aon par

yaqin kijiye dastar-e-sar usi se mili

jise sharik-e-gham-e-zindagi bana na sake

tamam 'umr ko ye chashm-e-tar usi se mili

tamam raat guzari KHayal mein jis ke

sahar hui to hamari nazar usi se mili

bulandiyan mere qadmon ko chumti hain 'atiq'

magar ye quwwat-e-parwaz-e-par usi se mili