غبار راہ میں سمت سفر اسی سے ملی

غبار راہ میں سمت سفر اسی سے ملی

وسیلہ کوئی ہو منزل مگر اسی سے ملی

دل و نگاہ کو آفاقیت بھی دی اس نے

مرے ہنر کو ضیائے ہنر اسی سے ملی

نہ چھوڑا ہاتھ سے دامان عظمت اسلاف

مجھے بلندیٔ ذوق نظر اسی سے ملی

بھروسا مجھ کو تھا ماں باپ کی دعاؤں پر

یقین کیجیے دستار سر اسی سے ملی

جسے شریک غم زندگی بنا نہ سکے

تمام عمر کو یہ چشم تر اسی سے ملی

تمام رات گزاری خیال میں جس کے

سحر ہوئی تو ہماری نظر اسی سے ملی

بلندیاں مرے قدموں کو چومتی ہیں عتیقؔ

مگر یہ قوت پرواز پر اسی سے ملی