ghubar-e-shab zara is amr ki KHabar karna

ġhubār-e-shab zarā is amr kī ḳhabar karnā

kahāñ se hai mujhe ab hijr kā safar karnā

ye mauj-e-bād-e-zamāna hai be-lihāz bahut

tum apne apne charāġhoñ pe ik nazar karnā

rahā na us ko agar mujh pe e'timād to phir

kisī havāle se kyā ḳhud ko mo'atabar karnā

duā.eñ de ke hī karnā hai ab use ruḳhsat

phir apne saath jo honā hai darguzar karnā

vahāñ vahāñ mirī nīñdoñ ko jāgtā paanā

jahāñ jahāñ mire hisse kī shab basar karnā

hai ik ḳhayāl makīñ kab se ḳhāna-e-dil meñ

zarā sī baat pe kyā is ko dar-ba-dar karnā

vo de rahā thā mujhe aaj be-gharī kī duā

to yaad aayā bahut us kā dil meñ ghar karnā

ki māñgnā mirā chehra jo shahr-e-be-chehra

tū apne vus.at-e-dāman pe ik nazar karnā

ghubar-e-shab zara is amr ki KHabar karna

kahan se hai mujhe ab hijr ka safar karna

ye mauj-e-baad-e-zamana hai be-lihaz bahut

tum apne apne charaghon pe ek nazar karna

raha na us ko agar mujh pe e'timad to phir

kisi hawale se kya KHud ko mo'atabar karna

duaen de ke hi karna hai ab use ruKHsat

phir apne sath jo hona hai darguzar karna

wahan wahan meri nindon ko jagta pana

jahan jahan mere hisse ki shab basar karna

hai ek KHayal makin kab se KHana-e-dil mein

zara si baat pe kya is ko dar-ba-dar karna

wo de raha tha mujhe aaj be-ghari ki dua

to yaad aaya bahut us ka dil mein ghar karna

ki mangna mera chehra jo shahr-e-be-chehra

tu apne wusat-e-daman pe ek nazar karna