ghubar-o-gard ne samjha hai rahnuma mujhko

ġhubār-o-gard ne samjhā hai rahnumā mujh ko

talāsh kartā phirā hai ye qāfila mujh ko

tavīl rāh-e-safar par haiñ phuuT phuuT paḌā

na kyuuñ samajhte mire pair aabla mujh ko

shikast-e-dil kī sadā huuñ bikhar bhī jaane de

ḳhutūt-o-rañg kī zanjīr mat pinhā mujh ko

zamīn par hai samundar falak pe abr-e-ġhubār

utārtī hai kahāñ dekhiye havā mujh ko

sukūt tark-e-ta.alluq kā ik garāñ lamha

banā gayā hai sadāoñ kā silsila mujh ko

vo duur duur se ab kyuuñ mujhe jalātā hai

qarīb aa ke bahut jo bujhā gayā mujh ko

rachā ke ek tilism-e-savābit-o-sayyār

kashish meñ apnī bulāne lagā ḳhalā mujh ko

ghubar-o-gard ne samjha hai rahnuma mujh ko

talash karta phira hai ye qafila mujh ko

tawil rah-e-safar par hain phuT phuT paDa

na kyun samajhte mere pair aabla mujh ko

shikast-e-dil ki sada hun bikhar bhi jaane de

KHutut-o-rang ki zanjir mat pinha mujh ko

zamin par hai samundar falak pe abr-e-ghubar

utarti hai kahan dekhiye hawa mujh ko

sukut tark-e-talluq ka ek garan lamha

bana gaya hai sadaon ka silsila mujh ko

wo dur dur se ab kyun mujhe jalata hai

qarib aa ke bahut jo bujha gaya mujh ko

racha ke ek tilism-e-sawabit-o-sayyar

kashish mein apni bulane laga KHala mujh ko