ghubar sa hai sar-e-shaKH-sar kahte hain

ġhubār sā hai sar-e-shāḳh-sār kahte haiñ

chalā hai qāfila-e-nau-bahār kahte haiñ

badal ga.ī haiñ jahāñ par vafā kī sab rasmeñ

ujaḌ ga.e haiñ diloñ ke dayār kahte haiñ

is ek baat se gulchīñ kā dil dhaḌaktā hai

ki ham sabā se hadīs-e-bahār kahte haiñ

ye hajv-e-mai to kisī maslahat se hai varna

faqīh-e-shahr bhī hai bāda-ḳhvār kahte haiñ

jise kabhī sar-e-mimbar na kah sakā vaa.iz

vo baat ahl-e-junūñ zer-e-dār kahte haiñ

'salīm' sāya-e-gul ho ki saḳhtī-e-zindāñ

junūñ hai sheva-e-mardān-e-kār kahte haiñ

ghubar sa hai sar-e-shaKH-sar kahte hain

chala hai qafila-e-nau-bahaar kahte hain

badal gai hain jahan par wafa ki sab rasmen

ujaD gae hain dilon ke dayar kahte hain

is ek baat se gulchin ka dil dhaDakta hai

ki hum saba se hadis-e-bahaar kahte hain

ye hajw-e-mai to kisi maslahat se hai warna

faqih-e-shahr bhi hai baada-KHwar kahte hain

jise kabhi sar-e-mimbar na kah saka waiz

wo baat ahl-e-junun zer-e-dar kahte hain

'salim' saya-e-gul ho ki saKHti-e-zindan

junun hai shewa-e-mardan-e-kar kahte hain