gudaz-e-dil mata-e-chashm-e-nam tak bech dete hain

gudāz-e-dil matā-e-chashm-e-nam tak bech dete haiñ

ye ahl-e-hosh ulfat kā bharam tak bech dete haiñ

munāsib daam lag jaa.eñ to ḳhūbān-e-parī-chehra

badan ke loch aur zulfoñ ke ḳham tak bech dete haiñ

ye kaise pāsbān-e-gulsitāñ haiñ jo bahāroñ meñ

guloñ kā rañg-o-bū shāḳhoñ kā tum tak bech dete haiñ

tijārat par yahāñ buniyād hai aapas ke rishtoñ kī

yahāñ ahl-e-karam dast-e-karam tak bech dete haiñ

ab is se baḌh ke fikr-o-zehn kī tauhīn kyā hogī

ki arbāb-e-qalam apne qalam tak bech dete haiñ

vaqār-e-mai-kada par jaan de dete haiñ ham 'maikash'

haram vaale to nāmūs-e-haram tak bech dete haiñ

gudaz-e-dil mata-e-chashm-e-nam tak bech dete hain

ye ahl-e-hosh ulfat ka bharam tak bech dete hain

munasib dam lag jaen to KHuban-e-pari-chehra

badan ke loch aur zulfon ke KHam tak bech dete hain

ye kaise pasban-e-gulsitan hain jo bahaaron mein

gulon ka rang-o-bu shaKHon ka tum tak bech dete hain

tijarat par yahan buniyaad hai aapas ke rishton ki

yahan ahl-e-karam dast-e-karam tak bech dete hain

ab is se baDh ke fikr-o-zehn ki tauhin kya hogi

ki arbab-e-qalam apne qalam tak bech dete hain

waqar-e-mai-kada par jaan de dete hain hum 'maikash'

haram wale to namus-e-haram tak bech dete hain