gudaz-e-dil se mila sozish-e-jigar se mila

gudāz-e-dil se milā sozish-e-jigar se milā

jo qahqahoñ meñ gañvāyā thā chashm-e-tar se milā

ta.alluqāt ke ai dil hazār pahlū haiñ

na jaane mujh se vo kis nuqta-e-nazar se milā

kabhī thakan kā kabhī fāsloñ kā ronā hai

safar kā hausla mujh ko na ham-safar se milā

maiñ dūsroñ ke liye be-qarār phirtā huuñ

ajiib dard mujhe mere chāra-gar se milā

har inqalāb kī tārīḳh ye batātī hai

vo manziloñ pe na paayā jo rahguzar se milā

na maiñ ne soz hī paayā na istaqāmat hī

hajar hajar ko TaTolā shajar shajar se milā

'hafīz' ho gayā āḳhir ajal se ham-āġhosh

tamām shab kā satāyā huā sahar se milā

gudaz-e-dil se mila sozish-e-jigar se mila

jo qahqahon mein ganwaya tha chashm-e-tar se mila

talluqat ke ai dil hazar pahlu hain

na jaane mujh se wo kis nuqta-e-nazar se mila

kabhi thakan ka kabhi faslon ka rona hai

safar ka hausla mujh ko na ham-safar se mila

main dusron ke liye be-qarar phirta hun

ajib dard mujhe mere chaara-gar se mila

har inqalab ki tariKH ye batati hai

wo manzilon pe na paya jo rahguzar se mila

na main ne soz hi paya na istaqamat hi

hajar hajar ko TaTola shajar shajar se mila

'hafiz' ho gaya aaKHir ajal se ham-aghosh

tamam shab ka sataya hua sahar se mila