gudaz-e-harf-e-nau-gufta yaqini hai mohabbat

gudāz-e-harf-e-nau-gufta yaqīnī hai mohabbat

tirī buniyād par she'r-āfrīnī hai mohabbat

dil-e-ḳhush-fahm se is baat par ab kaun uljhe

jo kahtā hai ki terī ham-nashīnī hai mohabbat

ġhamoñ ko muskurā kar jhelnā aatā hai tujh ko

tire ausāf meñ ḳhanda-jabīnī hai mohabbat

tirī qurbat meñ dil shādāb hotā jā rahā hai

yahī din haiñ ki mujh meñ bhīnī-bhīnī hai mohabbat

ham ahl-e-dil ke sab dā've ġhalat sābit hue haiñ

ġham-e-duniyā ne āḳhir-kār chhīnī hai mohabbat

mohabbat kī hadoñ ko bas ḳhudā hī jāntā hai

varā-e-sarhad-e-rūh-ul-amīnī hai mohabbat

ye kyā duhrī musībat hai maiñ jis meñ mubtalā huuñ

dil-e-īzā-talab ke saath jiinī hai mohabbat

gudaz-e-harf-e-nau-gufta yaqini hai mohabbat

teri buniyaad par she'r-afrini hai mohabbat

dil-e-KHush-fahm se is baat par ab kaun uljhe

jo kahta hai ki teri ham-nashini hai mohabbat

ghamon ko muskura kar jhelna aata hai tujh ko

tere ausaf mein KHanda-jabini hai mohabbat

teri qurbat mein dil shadab hota ja raha hai

yahi din hain ki mujh mein bhini-bhini hai mohabbat

hum ahl-e-dil ke sab da'we ghalat sabit hue hain

gham-e-duniya ne aaKHir-kar chhini hai mohabbat

mohabbat ki hadon ko bas KHuda hi jaanta hai

wara-e-sarhad-e-ruh-ul-amini hai mohabbat

ye kya duhri musibat hai main jis mein mubtala hun

dil-e-iza-talab ke sath jini hai mohabbat