گداز حرف نو گفتہ یقینی ہے محبت

گداز حرف نو گفتہ یقینی ہے محبت

تری بنیاد پر شعر آفرینی ہے محبت

دل خوش فہم سے اس بات پر اب کون الجھے

جو کہتا ہے کہ تیری ہم نشینی ہے محبت

غموں کو مسکرا کر جھیلنا آتا ہے تجھ کو

ترے اوصاف میں خندہ جبینی ہے محبت

تری قربت میں دل شاداب ہوتا جا رہا ہے

یہی دن ہیں کہ مجھ میں بھینی بھینی ہے محبت

ہم اہل دل کے سب دعوے غلط ثابت ہوئے ہیں

غم دنیا نے آخر کار چھینی ہے محبت

محبت کی حدوں کو بس خدا ہی جانتا ہے

ورائے سرحد روح الامینی ہے محبت

یہ کیا دہری مصیبت ہے میں جس میں مبتلا ہوں

دل ایذا طلب کے ساتھ جینی ہے محبت