gudaz-e-qalb na soz-e-dawam hai saqi

gudāz-e-qalb na soz-e-davām hai saaqī

saroñ meñ mahshar-e-saudā-e-ḳhām hai saaqī

har ek rind yahāñ tishna-kām hai saaqī

ye mai-kade kā tire ehtimām hai saaqī

pilā pilā ki nizām-e-kohan badal Dālūñ

samand-e-umr bahut tez-gām hai saaqī

chalā huuñ aaj liye azm-e-rah-navardī-e-shauq

ḳhayāl-e-ishrat-e-manzil harām hai saaqī

nazar nazar se numāyāñ qiyādatoñ kā fusūñ

qadam qadam pe siyāsat kā daam hai saaqī

vo dil jo thā kabhī kaun-o-makāñ se be-parvā

shikār-e-kashmakash-e-sub.h-o-shām hai saaqī

hudūd-e-ālam-e-imkāñ se dam ulajhtā hai

yahāñ to saañs bhī lenā harām hai saaqī

faroġh-e-hasrat-e-parvāz-o-justujū kī qasam

junūñ ḳhirad kā abhī tak ġhulām hai saaqī

bashart-e-izn sunā.ūñgā ḳhalvatoñ meñ tujhe

abhī fasāna-e-ġham nā-tamām hai saaqī

gudaz-e-qalb na soz-e-dawam hai saqi

saron mein mahshar-e-sauda-e-KHam hai saqi

har ek rind yahan tishna-kaam hai saqi

ye mai-kade ka tere ehtimam hai saqi

pila pila ki nizam-e-kohan badal Dalun

samand-e-umr bahut tez-gam hai saqi

chala hun aaj liye azm-e-rah-nawardi-e-shauq

KHayal-e-ishrat-e-manzil haram hai saqi

nazar nazar se numayan qiyaadaton ka fusun

qadam qadam pe siyasat ka dam hai saqi

wo dil jo tha kabhi kaun-o-makan se be-parwa

shikar-e-kashmakash-e-subh-o-sham hai saqi

hudud-e-alam-e-imkan se dam ulajhta hai

yahan to sans bhi lena haram hai saqi

farogh-e-hasrat-e-parwaz-o-justuju ki qasam

junun KHirad ka abhi tak ghulam hai saqi

bashart-e-izn sunaunga KHalwaton mein tujhe

abhi fasana-e-gham na-tamam hai saqi