گداز قلب نہ سوز دوام ہے ساقی

گداز قلب نہ سوز دوام ہے ساقی

سروں میں محشر سودائے خام ہے ساقی

ہر ایک رند یہاں تشنہ کام ہے ساقی

یہ میکدے کا ترے اہتمام ہے ساقی

پلا پلا کہ نظام کہن بدل ڈالوں

سمند عمر بہت تیز گام ہے ساقی

چلا ہوں آج لئے عزم رہ نوردیٔ شوق

خیال عشرت منزل حرام ہے ساقی

نظر نظر سے نمایاں قیادتوں کا فسوں

قدم قدم پہ سیاست کا دام ہے ساقی

وہ دل جو تھا کبھی کون و مکاں سے بے پروا

شکار کشمکش صبح و شام ہے ساقی

حدود عالم امکاں سے دم الجھتا ہے

یہاں تو سانس بھی لینا حرام ہے ساقی

فروغ حسرت پرواز و جستجو کی قسم

جنوں خرد کا ابھی تک غلام ہے ساقی

بشرط اذن سناؤں گا خلوتوں میں تجھے

ابھی فسانۂ غم ناتمام ہے ساقی