guftugu kyun na karen dida-e-tar se baadal

guftugū kyuuñ na kareñ dīda-e-tar se bādal

lauT aa.e haiñ sitāroñ ke safar se bādal

kyā ġhazabnāk thī sūraj kī barahna shamshīr

kaale mujrim kī tarah nikle na ghar se bādal

raat kī kokh koī chāñd kahāñ se laa.e

ye zamīñ bāñjh hai barse ki na barse bādal

barf se kahiye ki sauġhāt kare un kī qubūl

laa.e haiñ aag ke dastāne safar se bādal

maiñ ki huuñ dhuup kā āzād parinda lekin

baal kyuuñ noch rahe haiñ mire par se bādal

āḳhirī ḳhat to likhūñgā maiñ lahū se ḳhud ko

ab bhī māyūs jo lauTe tire dar se bādal

na kisī jism kā jaadū na ghaTā gesū kī

'prem' kyuuñ ruuTh ga.e prem-nagar se bādal

guftugu kyun na karen dida-e-tar se baadal

lauT aae hain sitaron ke safar se baadal

kya ghazabnak thi suraj ki barahna shamshir

kale mujrim ki tarah nikle na ghar se baadal

raat ki kokh koi chand kahan se lae

ye zamin banjh hai barse ki na barse baadal

barf se kahiye ki saughat kare un ki qubul

lae hain aag ke dastane safar se baadal

main ki hun dhup ka aazad parinda lekin

baal kyun noch rahe hain mere par se baadal

aaKHiri KHat to likhunga main lahu se KHud ko

ab bhi mayus jo lauTe tere dar se baadal

na kisi jism ka jadu na ghaTa gesu ki

'prem' kyun ruTh gae prem-nagar se baadal