گل دیکھنا تو چشم گل تر بھی دیکھنا

گل دیکھنا تو چشم گل تر بھی دیکھنا

شبنم نے جو پروئے ہیں گوہر بھی دیکھنا

ساحل سے ہو سکے گا نہ اندازۂ سکوت

گہرے سمندروں میں اتر کر بھی دیکھنا

ہاتھوں میں لے کے پھول کھڑے ہیں جو راہ میں

تم پر وہی اٹھائیں گے پتھر بھی دیکھنا

یہ کیا کہ اپنی ذات کے اندر ہی گم رہے

اک روز اپنے آپ سے باہر بھی دیکھنا

پھیلانا چاہتے ہو اگر پاؤں تو سنو

لازم ہے تم پہ اپنی یہ چادر بھی دیکھنا

جی بھر کے جب بہار کی رت دیکھ لو تو پھر

اجڑی ہوئی رتوں کے یہ منظر بھی دیکھنا

ضیغمؔ ہزار رونق محفل بھلی سہی

تنہائی جو اٹھائے گی محشر بھی دیکھنا