gul-e-KHush-numa ke libas mein ki shua-e-nur hain Dhal ke aa

gul-e-ḳhush-numā ke libās meñ ki shuā-e-nūr haiñ Dhal ke aa

tujhe DhūñDh legī mirī nazar tū hazār rang badal ke aa

tire dil kī aag haqīqatan tire haq meñ fasl-e-bahār hai

jo bujhā.e se bhī na bujh sake usī dil kī aag meñ jal ke aa

tirī justujū bhī hijāb hai tirī aarzū bhī hijāb hai

kabhī dām-e-aql-o-shu.ūr se jo nikal sake to nikal ke aa

ye hai ahl-e-zarf kī anjuman ye hai ahl-e-ishq kā mai-kada

tū hazār nashsha meñ chuur ho jo yahāñ pe aa to sañbhal ke aa

mah-o-mehr meñ bhī hai dilkashī magar is kī baat hai aur hī

tujhe ārzū-e-jamāl hai tū harīm-e-nāz meñ chal ke aa

ye junūn-e-ishq kī shaan hai tujhe log kuchh bhī kahā kareñ

jo atā-e-kū-e-habīb hai vahī ḳhaak chehre pe mal ke aa

tū hazār parda kiyā kare na chhupegī husn kī dilkashī

vo libās-e-kohna pahan ke aa ki nayā libās badal ke aa

asar-āfrīn-e-bahār hai tirī fikr 'shā.ir'-e-ḳhush-navā

jinheñ chhū sake na ḳhizāñ kabhī vahī phuul le ke ġhazal ke aa

gul-e-KHush-numa ke libas mein ki shua-e-nur hain Dhal ke aa

tujhe DhunDh legi meri nazar tu hazar rang badal ke aa

tere dil ki aag haqiqatan tere haq mein fasl-e-bahaar hai

jo bujhae se bhi na bujh sake usi dil ki aag mein jal ke aa

teri justuju bhi hijab hai teri aarzu bhi hijab hai

kabhi dam-e-aql-o-shuur se jo nikal sake to nikal ke aa

ye hai ahl-e-zarf ki anjuman ye hai ahl-e-ishq ka mai-kada

tu hazar nashsha mein chur ho jo yahan pe aa to sanbhal ke aa

mah-o-mehr mein bhi hai dilkashi magar is ki baat hai aur hi

tujhe aarzu-e-jamal hai tu harim-e-naz mein chal ke aa

ye junun-e-ishq ki shan hai tujhe log kuchh bhi kaha karen

jo ata-e-ku-e-habib hai wahi KHak chehre pe mal ke aa

tu hazar parda kiya kare na chhupegi husn ki dilkashi

wo libas-e-kohna pahan ke aa ki naya libas badal ke aa

asar-afrin-e-bahaar hai teri fikr 'shair'-e-KHush-nawa

jinhen chhu sake na KHizan kabhi wahi phul le ke ghazal ke aa