گل خوش نما کے لباس میں کہ شعاع نور ہیں ڈھل کے آ

گل خوش نما کے لباس میں کہ شعاع نور ہیں ڈھل کے آ

تجھے ڈھونڈھ لے گی مری نظر تو ہزار رنگ بدل کے آ

ترے دل کی آگ حقیقتاً ترے حق میں فصل بہار ہے

جو بجھائے سے بھی نہ بجھ سکے اسی دل کی آگ میں جل کے آ

تری جستجو بھی حجاب ہے تری آرزو بھی حجاب ہے

کبھی دام عقل و شعور سے جو نکل سکے تو نکل کے آ

یہ ہے اہل ظرف کی انجمن یہ ہے اہل عشق کا میکدہ

تو ہزار نشہ میں چور ہو جو یہاں پہ آ تو سنبھل کے آ

مہ و مہر میں بھی ہے دل کشی مگر اس کی بات ہے اور ہی

تجھے آرزوئے جمال ہے تو حریم ناز میں چل کے آ

یہ جنون عشق کی شان ہے تجھے لوگ کچھ بھی کہا کریں

جو عطائے کوئے حبیب ہے وہی خاک چہرہ پہ مل کے آ

تو ہزار پردہ کیا کرے نہ چھپے گی حسن کی دل کشی

وہ لباس کہنہ پہن کے آ کہ نیا لباس بدل کے آ

اثر آفرین بہار ہے تری فکر شاعرؔ خوش نوا

جنہیں چھو سکے نہ خزاں کبھی وہی پھول لے کے غزل کے آ