gul-e-virana hun koi nahin hai qadr-dan mera

gul-e-vīrāna huuñ koī nahīñ hai qadr-dāñ merā

tū hī dekh ai mire ḳhallāq husn-e-rā.egāñ merā

ye kah kar ruuh niklī hai tan-e-āshiq se furqat meñ

mujhe ujlat hai baḌh jaa.e na aage kārvāñ merā

havā us ko uḌā le jaa.e ab yā phūñk de bijlī

hifāzat kar nahīñ saktā mirī jab āshiyāñ merā

zamīñ par baar huuñ aur āsmān se duur ai mālik

nahīñ mālūm kuchh āḳhir Thikānā hai kahāñ merā

mujhe naġhme kā lutf aatā hai rātoñ kī ḳhamoshī meñ

dil-e-bashikasta hai ik sāz-e-āhañg fuġhāñ merā

vahīñ se ibtidā-e-kūcha-e-dildār kī had hai

qadam ḳhud chalte chalte aa ke ruk jaa.e jahāñ merā

zarā duur aur hai ai kashti-e-umr-e-ravāñ sāhil

ki is bahr-e-jahāñ meñ har nafas hai bādbāñ merā

huī jaatī hai tanhā.ī meñ lazzat ruuh kī zaa.e.a

luTā jaatā hai vīrāne meñ ganj-e-shā.egāñ merā

anāsir hañste haiñ duniyā kī vus.at muskurātī hai

kisī se pūchhte haiñ ahl-e-bīnash jab nishāñ merā

mire ba.ad aur phir koī nazar mujh sā nahīñ aatā

bahut din tak rakkheñge sog ahl-e-ḳhāndāñ merā

ġhanīmat hai nafas do chaar jo baaqī haiñ ab varna

kabhī kā luT chukā sarmāya-e-sod-o-ziyāñ merā

abhī tak fasl-e-gul meñ ik sadā-e-dard aatī hai

vahāñ kī ḳhaak se pahle jahāñ thā āshiyāñ merā

'ravāñ' sach hai mohabbat kā asar zaa.e.a nahīñ hotā

vo ro dete haiñ ab bhī zikr aatā hai jahāñ merā

gul-e-virana hun koi nahin hai qadr-dan mera

tu hi dekh ai mere KHallaq husn-e-raegan mera

ye kah kar ruh nikli hai tan-e-ashiq se furqat mein

mujhe ujlat hai baDh jae na aage karwan mera

hawa us ko uDa le jae ab ya phunk de bijli

hifazat kar nahin sakta meri jab aashiyan mera

zamin par bar hun aur aasman se dur ai malik

nahin malum kuchh aaKHir Thikana hai kahan mera

mujhe naghme ka lutf aata hai raaton ki KHamoshi mein

dil-e-bashikasta hai ek saz-e-ahang fughan mera

wahin se ibtida-e-kucha-e-dildar ki had hai

qadam KHud chalte chalte aa ke ruk jae jahan mera

zara dur aur hai ai kashti-e-umr-e-rawan sahil

ki is bahr-e-jahan mein har nafas hai baadban mera

hui jati hai tanhai mein lazzat ruh ki zaea

luTa jata hai virane mein ganj-e-shaegan mera

anasir hanste hain duniya ki wusat muskuraati hai

kisi se puchhte hain ahl-e-binash jab nishan mera

mere baad aur phir koi nazar mujh sa nahin aata

bahut din tak rakkhenge sog ahl-e-KHandan mera

ghanimat hai nafas do chaar jo baqi hain ab warna

kabhi ka luT chuka sarmaya-e-sod-o-ziyan mera

abhi tak fasl-e-gul mein ek sada-e-dard aati hai

wahan ki KHak se pahle jahan tha aashiyan mera

'rawan' sach hai mohabbat ka asar zaea nahin hota

wo ro dete hain ab bhi zikr aata hai jahan mera