گل ہے بلبل سے خفا گل سے صبا بگڑی ہے

گل ہے بلبل سے خفا گل سے صبا بگڑی ہے

بعد مدت کے گلستاں کی ہوا بگڑی ہے

صبح سے جان کا دشمن وہ رخ روشن تھا

شام سے دل کے لئے زلف دوتا بگڑی ہے

نقش بر آب ہے یہ نقش و نگار دنیا

خانۂ دہر کی اول سے بنا بگڑی ہے

کیا عجب صور پھنکے آگ لگے دوزخ میں

نالہ بگڑا ہے مری آہ رسا بگڑی ہے

راہ بھولے مرے گھر کی تو گئے غیر کے گھر

ہائے کیسی مری تقدیر رسا بگڑی ہے

خون کرنا اسے منظور ہے خود طالبؔ کا

اس لئے خنجر قاتل سے حنا بگڑی ہے