gul hansa to hansa diya kis ne

gul hañsā to hañsā diyā kis ne

royā bulbul rulā diyā kis ne

sham.a parvāna ko jalātī hai

sham.a kā dil jalā diyā kis ne

ḳhvāb meñ shab ko aa zuleḳhā ke

shakl-e-yūsuf dikhā diyā kis ne

shaiḳh aur barhaman nahīñ samjhe

dair-o-ka.aba basā diyā kis ne

aag meñ jab gire ḳhalīlullāh

Daalā kis ne bujhā diyā kis ne

muñh se mansūr ke anal-haq ko

kahā kis ne sazā diyā kis ne

hai vahī to samajh le bas ḳhāmosh

tujh ko aql-e-rasā diyā kis ne

gul hansa to hansa diya kis ne

roya bulbul rula diya kis ne

shama parwana ko jalati hai

shama ka dil jala diya kis ne

KHwab mein shab ko aa zuleKHa ke

shakl-e-yusuf dikha diya kis ne

shaiKH aur barhaman nahin samjhe

dair-o-kaba basa diya kis ne

aag mein jab gire KHalilullah

Dala kis ne bujha diya kis ne

munh se mansur ke anal-haq ko

kaha kis ne saza diya kis ne

hai wahi to samajh le bas KHamosh

tujh ko aql-e-rasa diya kis ne