gul hue chaak-gareban sar-e-gulzar ai dil

gul hue chāk-garebāñ sar-e-gulzār ai dil

ban gayā rañg-e-chaman bā.is-e-āzār ai dil

sham.a-rū ho ga.e fānūs-e-haram ke qaidī

ab kahāñ raushnī-e-garmī-e-bāzār ai dil

silsila ātish-e-sozāñ kā hai darpesh junūñ

ab na dīvār na hai sāya-e-dīvār ai dil

shīsha-e-ḳhvāb jo TuuTā to vo āsār ga.e

chashm-e-bedār bhī hai nargis-e-bīmār ai dil

halqa-e-dīd meñ hai paikar-e-manzar bhī asiir

ham hue apnī hī āñkhoñ ke giraftār ai dil

jalva-e-husn-e-tamannā hai unheñ aks-e-jamāl

jo sarāboñ meñ haiñ sahrā ke giraftār ai dil

raas aa.ī hameñ shab-gardī-o-be-rāh-ravī

ḳhuub āzād hue tere giraftār ai dil

shaam ke saa.e lapakte chale aate haiñ so ab

jo bhī kuchh hai vo hai girtī huī dīvār ai dil

gul hue chaak-gareban sar-e-gulzar ai dil

ban gaya rang-e-chaman bais-e-azar ai dil

shama-ru ho gae fanus-e-haram ke qaidi

ab kahan raushni-e-garmi-e-bazar ai dil

silsila aatish-e-sozan ka hai darpesh junun

ab na diwar na hai saya-e-diwar ai dil

shisha-e-KHwab jo TuTa to wo aasar gae

chashm-e-bedar bhi hai nargis-e-bimar ai dil

halqa-e-did mein hai paikar-e-manzar bhi asir

hum hue apni hi aankhon ke giraftar ai dil

jalwa-e-husn-e-tamanna hai unhen aks-e-jamal

jo sarabon mein hain sahra ke giraftar ai dil

ras aai hamein shab-gardi-o-be-rah-rawi

KHub aazad hue tere giraftar ai dil

sham ke sae lapakte chale aate hain so ab

jo bhi kuchh hai wo hai girti hui diwar ai dil