gul ka wo ruKH bahaar ke aaghaz se uTha

gul kā vo ruḳh bahār ke āġhāz se uThā

sho.ala sā andalīb kī āvāz se uThā

nau-dast zaḳhma-var ne miTā dī had-e-kamāl

parde jale tamām dhuāñ saaz se uThā

jaise duā-e-nīm-shabī kā surūd ho

ik shor mai-kade meñ is andāz se uThā

mahzar liye junūñ meñ savāl-o-javāb kā

parda sā ek dīda-e-ġhammāz se uThā

baaqī abhī hai tañgī-o-vus.at meñ ek farq

us ko bhī jumbish-e-lab-e-e.ajāz se uThā

vo shaḳhs thā muraqqā ma.anī kī ek zid

rang-e-hazār husn-e-junnūñ-sāz se uThā

kāñTe zamīñ se aur ziyāda hue tulūa

ik mas.ala bahār ke āġhāz se uThā

bantī matā-e-kashf to kyā aa.ine kī chhūT

lazzat hī kuchh ishāra-e-ham-rāz se uThā

yā-rab tū laaj rakh mire shauq-e-fuzūl kī

duniyā hai niiñd meñ mirī āvāz se uThā

ik manzar-e-kināra-e-bām aur de gayā

partau sā koī us ke dar-e-bāz se uThā

maiñ kyā ki mere baad bhī jo log vaañ ga.e

koī na us kī anjuman-e-nāz se uThā

'madnī' qafas meñ sub.h huī aur us ke baad

dil se dhuāñ bhī hasrat-e-parvāz se uThā

gul ka wo ruKH bahaar ke aaghaz se uTha

shoala sa andalib ki aawaz se uTha

nau-dast zaKHma-war ne miTa di had-e-kamal

parde jale tamam dhuan saz se uTha

jaise dua-e-nim-shabi ka surud ho

ek shor mai-kade mein is andaz se uTha

mahzar liye junun mein sawal-o-jawab ka

parda sa ek dida-e-ghammaz se uTha

baqi abhi hai tangi-o-wusat mein ek farq

us ko bhi jumbish-e-lab-e-eajaz se uTha

wo shaKHs tha muraqqa mani ki ek zid

rang-e-hazar husn-e-junnun-saz se uTha

kanTe zamin se aur ziyaada hue tulua

ek masala bahaar ke aaghaz se uTha

banti mata-e-kashf to kya aaine ki chhuT

lazzat hi kuchh ishaara-e-ham-raaz se uTha

ya-rab tu laj rakh mere shauq-e-fuzul ki

duniya hai nind mein meri aawaz se uTha

ek manzar-e-kinara-e-baam aur de gaya

partau sa koi us ke dar-e-baz se uTha

main kya ki mere baad bhi jo log wan gae

koi na us ki anjuman-e-naz se uTha

'madni' qafas mein subh hui aur us ke baad

dil se dhuan bhi hasrat-e-parwaz se uTha