گل کے تھے گلستاں کے تھے ہی نہیں

گل کے تھے گلستاں کے تھے ہی نہیں

ہم تو جیسے وہاں کے تھے ہی نہیں

کارواں اس لئے ہی چھوڑا تھا

ہم ترے کارواں کے تھے ہی نہیں

جن سے کرنی تھی گفتگو ہم کو

وہ ہماری زباں کے تھے ہی نہیں

آپ سنتے تو سن کے رو دیتے

واقعے وہ بیاں کے تھے ہی نہیں

موسم گل کے انتظار میں تھے

ہم خزاں میں خزاں کے تھے ہی نہیں

وہ جہاں تھے وہیں رہے اب تک

ہم جہاں ہیں وہاں کے تھے ہی نہیں

میں نے سمجھا تھا داستاں جن کو

وہ مری داستاں کے تھے ہی نہیں