gul ke the gulsitan ke the hi nahin

gul ke the gulsitāñ ke the hī nahīñ

ham to jaise vahāñ ke the hī nahīñ

kārvāñ is liye hī chhoḌā thā

ham tire kārvāñ ke the hī nahīñ

jin se karnī thī guftugū ham ko

vo hamārī zabāñ ke the hī nahīñ

aap sunte to sun ke ro dete

vāqiye vo bayāñ ke the hī nahīñ

mausam-e-gul ke intizār meñ the

ham ḳhizāñ meñ ḳhizāñ ke the hī nahīñ

vo jahāñ the vahīñ rahe ab tak

ham jahāñ haiñ vahāñ ke the hī nahīñ

maiñ ne samjhā thā dāstāñ jin ko

vo mirī dāstāñ ke the hī nahīñ

gul ke the gulsitan ke the hi nahin

hum to jaise wahan ke the hi nahin

karwan is liye hi chhoDa tha

hum tere karwan ke the hi nahin

jin se karni thi guftugu hum ko

wo hamari zaban ke the hi nahin

aap sunte to sun ke ro dete

waqiye wo bayan ke the hi nahin

mausam-e-gul ke intizar mein the

hum KHizan mein KHizan ke the hi nahin

wo jahan the wahin rahe ab tak

hum jahan hain wahan ke the hi nahin

main ne samjha tha dastan jin ko

wo meri dastan ke the hi nahin