gul ko KHushbu chand ko uslub-e-tabani mile

gul ko ḳhushbū chāñd ko uslūb-e-tābānī mile

mere jazbe se jahāñ ko husn-e-lāfānī mile

ujlī ujlī sī fazā meñ rañg bikhre pyaar kā

husn-kāroñ ko mirā ehsās-e-tābānī mile

dev-qāmat paikaroñ se dil mirā ghabrā gayā

ab to yārab 'aam sī ik shakl-e-insānī mile

is hujūm-e-ranj-o-ġham meñ ik zarā sā zahr bhī

zindagī ko is tarah se shāyad āsānī mile

allāh allāh zindagī meñ inkisārī kā ye ruup

ahl-e-naḳhvat ko bhī ham bā-ḳhanda peshānī mile

vaqt ke katbe pe 'shākir' naam ho kanda tirā

ahl-e-duniyā ko koī tahrīr lāfānī mile

gul ko KHushbu chand ko uslub-e-tabani mile

mere jazbe se jahan ko husn-e-lafani mile

ujli ujli si faza mein rang bikhre pyar ka

husn-karon ko mera ehsas-e-tabani mile

dew-qamat paikaron se dil mera ghabra gaya

ab to yarab 'am si ek shakl-e-insani mile

is hujum-e-ranj-o-gham mein ek zara sa zahr bhi

zindagi ko is tarah se shayad aasani mile

allah allah zindagi mein inkisari ka ye rup

ahl-e-naKHwat ko bhi hum ba-KHanda peshani mile

waqt ke katbe pe 'shakir' nam ho kanda tera

ahl-e-duniya ko koi tahrir lafani mile