گل نہیں ہوں مجھ سے کیوں کر رنگ و بو لے جائیے

گل نہیں ہوں مجھ سے کیوں کر رنگ و بو لے جائیے

جستجوئے بے سبب ہوں کو بہ کو لے جائیے

اس سے پہلے در بدر پھرنے لگے تا گوش و لب

ذہن و دل کے حاشیوں پر گفتگو لے جائیے

اب بھی میرے ظرف میں تھوڑی نمی ہے تہ نشیں

تلخیٔ ایام خون آرزو لے جائیے

سوچ کے دھاروں میں بہ جانے سے پہلے آپ بھی

ذائقے کے واسطے تھوڑا لہو لے جائیے

یاد کے سائے بھی داخل ان میں ہو پاتے نہیں

ایک صحرائے جنوں یا دشت ہو لے جائیے

بس یہی دونوں ہیں واقف آپ کے اعمال سے

اعتبار دوست یا چشم عدو لے جائیے