gul-o-gulzar guhar chand sitare bachche

gul-o-gulzār guhar chāñd sitāre bachche

rañg-o-bū nuur ke paikar haiñ ye saare bachche

aa.ine haiñ ki damakte hue chehre in ke

aise shaffāf ki dariyāoñ ke dhāre bachche

kitne ma.asūm ke ye saañp pakaḌnā chāheñ

kitne bhole haiñ ki chhūte haiñ sharāre bachche

aane vāloñ ko batā dete haiñ ghar kī bāteñ

kab samajhte haiñ ye āñkhoñ ke ishāre bachche

ḳhud se das-bīs baras aur baḌe lagte haiñ

ghar banāte hue dariyā ke kināre bachche

gaañv jaatā huuñ to chaupāl kā ik būḌhā daraḳht

bāheñ phailā ke ye kahtā ki aa re bachche

ab na vo khel khilaune na sharārat 'fārūq'

kitne ḳhāmosh akele haiñ hamāre bachche

gul-o-gulzar guhar chand sitare bachche

rang-o-bu nur ke paikar hain ye sare bachche

aaine hain ki damakte hue chehre in ke

aise shaffaf ki dariyaon ke dhaare bachche

kitne masum ke ye sanp pakaDna chahen

kitne bhole hain ki chhute hain sharare bachche

aane walon ko bata dete hain ghar ki baaten

kab samajhte hain ye aankhon ke ishaare bachche

KHud se das-bis baras aur baDe lagte hain

ghar banate hue dariya ke kinare bachche

ganw jata hun to chaupal ka ek buDha daraKHt

bahen phaila ke ye kahta ki aa re bachche

ab na wo khel khilaune na shararat 'faruq'

kitne KHamosh akele hain hamare bachche