gul yaad na amwaj-e-nasim-e-sahari yaad

gul yaad na amvāj-e-nasīm-e-saharī yaad

kuchh bhī nahīñ juz ālam-e-be-bāl-o-parī yaad

ḳhurshīd-e-sahar āriz-e-mahtāb kā aalam

nazroñ ko abhī tak hai tirī jalvagarī yaad

sū-e-haram-o-dair kabhī ruḳh na kareñge

jin ko mire saaqī kī hai rañgīñ-nazarī yaad

jalvoñ kā taqāzā nahīñ kartī nazar un kī

rahtī hai jinheñ husn kī dīvāna-garī yaad

ye vaqt ba-har-hāl guzar jā.egā lekin

rah jā.egī aahoñ kī hameñ be-asarī yaad

maiñ vo huuñ ki parde meñ tujhe dekh chukā huuñ

shāyad ho tujhe merī vasī.a-un-nazarī yaad

mai-ḳhāna thā aur shaġhl-e-mai-nāb thā 'shā.ir'

ab tak hai mujhe dāman-e-zāhid kī tarī yaad

gul yaad na amwaj-e-nasim-e-sahari yaad

kuchh bhi nahin juz aalam-e-be-baal-o-pari yaad

KHurshid-e-sahar aariz-e-mahtab ka aalam

nazron ko abhi tak hai teri jalwagari yaad

su-e-haram-o-dair kabhi ruKH na karenge

jin ko mere saqi ki hai rangin-nazari yaad

jalwon ka taqaza nahin karti nazar un ki

rahti hai jinhen husn ki diwana-gari yaad

ye waqt ba-har-haal guzar jaega lekin

rah jaegi aahon ki hamein be-asari yaad

main wo hun ki parde mein tujhe dekh chuka hun

shayad ho tujhe meri wasia-un-nazari yaad

mai-KHana tha aur shaghl-e-mai-nab tha 'shair'

ab tak hai mujhe daman-e-zahid ki tari yaad