gulab mange hai ne mahtab mange hai

gulāb māñge hai ne māhtāb māñge hai

shu.ūr-e-fan to lahū kī sharāb māñge hai

vo us kā lutf-o-karam mujh ġharīq-e-isyāñ se

gunāh māñge hai aur be-hisāb māñge hai

havas kī baaḌh har ik bāñdh toḌnā chāhe

nazar kā husn magar intiḳhāb māñge hai

kahāñ ho kho.e hue lamho! lauT kar aao

hayāt umr-e-guzishta kā baab māñge hai

mire kalām meñ tā.ūs bhī hai shāhīñ bhī

sināñ ke saath mirā fan rubāb māñge hai

chaḌhā rahā hai salīboñ pe ham ko sadiyoñ se

zamāna phir bhī muqaddas kitāb māñge hai

na jaane kitnī ghaTā.eñ uThī haiñ rāhoñ meñ

magar hai pyaas ki har dam sarāb māñge hai

hai zaḳhm-ḳhurda mire dil kā aa.ina aisā

ḳhirad kī teġh se thoḌī sī aab māñge hai

vo merī fahm kā letā hai imtihāñ shāyad

ki har savāl se pahle javāb māñge hai

bikhar gayā thā jo kal raat kirchiyoñ kī tarah

mirī nigāh vo TuuTā sā ḳhvāb māñge hai

karāmat us se jo pūchhūñ ki zindagī kyā hai

javāb dene ke badle hubāb māñge hai

gulab mange hai ne mahtab mange hai

shuur-e-fan to lahu ki sharab mange hai

wo us ka lutf-o-karam mujh ghariq-e-isyan se

gunah mange hai aur be-hisab mange hai

hawas ki baDh har ek bandh toDna chahe

nazar ka husn magar intiKHab mange hai

kahan ho khoe hue lamho! lauT kar aao

hayat umr-e-guzishta ka bab mange hai

mere kalam mein taus bhi hai shahin bhi

sinan ke sath mera fan rubab mange hai

chaDha raha hai salibon pe hum ko sadiyon se

zamana phir bhi muqaddas kitab mange hai

na jaane kitni ghaTaen uThi hain rahon mein

magar hai pyas ki har dam sarab mange hai

hai zaKHm-KHurda mere dil ka aaina aisa

KHirad ki tegh se thoDi si aab mange hai

wo meri fahm ka leta hai imtihan shayad

ki har sawal se pahle jawab mange hai

bikhar gaya tha jo kal raat kirchiyon ki tarah

meri nigah wo TuTa sa KHwab mange hai

karamat us se jo puchhun ki zindagi kya hai

jawab dene ke badle hubab mange hai