ghulam ki roz o shab ghulami mein kya kami thi

ġhulām kī roz o shab ġhulāmī meñ kyā kamī thī

kanīz ke iltifāt o ḳhūbī meñ kyā kamī thī

inheñ dar-e-ḳhvāb-gāh se kis liye haTāyā

muhāfizoñ kī vafā-shi'ārī meñ kyā kamī thī

jalāl-e-gītī satāñ se darbār kāñptā thā

muqarriboñ kī mizāj-fahmī meñ kyā kamī thī

girāñ guzartā thā kyuuñ tabī'at pe saath us kā

vazīr-zāde kī nukta-sanjī meñ kyā kamī thī

nashist meñ is qadar ta.ammul ba-vaqt-e-ruḳhsat

murassa' o musta'id savārī meñ kyā kamī thī

khaḌe the kyuuñ chaukīdār do-rūya neze thāme

mahal kī dīvār kī bulandī meñ kyā kamī thī

guzar na saktā thā koī ḳhvāja-sarā na bāñdī

haram ke rāzoñ kī pāsdārī meñ kyā kamī thī

na jaane sālār mutma.in kyuuñ nahīñ the 'yāsir'

sipāh ke 'azm o jāñ-sipārī meñ kyā kamī thī

ghulam ki roz o shab ghulami mein kya kami thi

kaniz ke iltifat o KHubi mein kya kami thi

inhen dar-e-KHwab-gah se kis liye haTaya

muhafizon ki wafa-shi'ari mein kya kami thi

jalal-e-giti satan se darbar kanpta tha

muqarribon ki mizaj-fahmi mein kya kami thi

giran guzarta tha kyun tabi'at pe sath us ka

wazir-zade ki nukta-sanji mein kya kami thi

nashist mein is qadar tammul ba-waqt-e-ruKHsat

murassa' o musta'id sawari mein kya kami thi

khaDe the kyun chaukidar do-ruya neze thame

mahal ki diwar ki bulandi mein kya kami thi

guzar na sakta tha koi KHwaja-sara na bandi

haram ke raazon ki pasdari mein kya kami thi

na jaane salar mutmain kyun nahin the 'yasir'

sipah ke 'azm o jaan-sipari mein kya kami thi