ghulam-zadon mein koi ghulam hai hi nahin

ġhulām-zādoñ meñ koī ġhulām hai hī nahīñ

hamāre shahr meñ sach kā nizām hai hī nahīñ

ye log jald hī patthar meñ Dhalne vaale haiñ

yahāñ kisī se koī ham-kalām hai hī nahīñ

maiñ dekhtā huuñ unheñ aur guzartā jaatā huuñ

tamām chehre haiñ chehroñ ke naam hai hī nahīñ

tumhārī marzī hai rakh lo hameñ yā Thukrā do

hamāre paas mohabbat kā daam hai hī nahīñ

ye log use tirī tasvīr hī samajhte haiñ

par us ke jaisā koī ḳhush-kalām hai hī nahīñ

vahāñ pe ḳhvāboñ ko ḳhairāt kar ke chalte bano

jahāñ shu.ūr-e-halāl-o-harām hai hī nahīñ

zarā sī lahje kī narmī se maan jā.eñge

ki bigḌe logoñ kā koī imaam hai hī nahīñ

ghulam-zadon mein koi ghulam hai hi nahin

hamare shahr mein sach ka nizam hai hi nahin

ye log jald hi patthar mein Dhalne wale hain

yahan kisi se koi ham-kalam hai hi nahin

main dekhta hun unhen aur guzarta jata hun

tamam chehre hain chehron ke nam hai hi nahin

tumhaari marzi hai rakh lo hamein ya Thukra do

hamare pas mohabbat ka dam hai hi nahin

ye log use teri taswir hi samajhte hain

par us ke jaisa koi KHush-kalam hai hi nahin

wahan pe KHwabon ko KHairaat kar ke chalte bano

jahan shuur-e-halal-o-haram hai hi nahin

zara si lahje ki narmi se man jaenge

ki bigDe logon ka koi imam hai hi nahin