gulon ka daur hai bulbul maze bahaar mein luT

guloñ kā daur hai bulbul maze bahār meñ luuT

ḳhizāñ machāegī aate hī is dayār meñ luuT

kushūd-e-kār kī koshish meñ de na hirs ko daḳhl

shikast detī hai faujoñ ko kār-zār meñ luuT

lubhā.e saikḌoñ dil un ke ḳhāl-e-āriz ne

machā.e zañgiyoñ ne vādī-e-tatār meñ luuT

vo muntazim hai rahe jis kī juz-o-kul pe nazar

na kar sake koī gūñgīr kārobār meñ luuT

jahāñ meñ hotī hai ehsān kī jazā ehsān

savāb nekiyoñ ke daur-e-iḳhtiyār meñ luuT

'abas hai buuñd kā chūkā agar ghaḌe Dhalkā.e

hamesha naqd meñ vaarā hai yaañ udhār meñ luuT

kiye haiñ sheb ne sab jism ke qavā kamzor

shurūa ho ga.ī har samt is hisār meñ luuT

hujūm-e-yās meñ chhoḌ ai ummīd kishvar-e-dil

hai qatl-e-ām kā ġhul shahr meñ javār meñ luuT

bane vo fāteh-e-kaunain ḳhush ho tū jis se

ziyāda ganj-e-kavākib se ho shumār meñ luuT

dayār-e-dil meñ hai phir dāġh-e-ishq kā toḌā

junūñ matā-e-havas mausam-e-bahār meñ luuT

bharī hai taaza har ek sar meñ shor-o-shar kī havā

'ajab nahīñ jo mache bāġh-e-rozgār meñ luuT

'habīb' mashq-e-riyāzat se kho ke zañg-e-duī

maze visāl ke har dam firāq-e-yār meñ luuT

gulon ka daur hai bulbul maze bahaar mein luT

KHizan machaegi aate hi is dayar mein luT

kushud-e-kar ki koshish mein de na hirs ko daKHl

shikast deti hai faujon ko kar-zar mein luT

lubhae saikDon dil un ke KHal-e-ariz ne

machae zangiyon ne wadi-e-tatar mein luT

wo muntazim hai rahe jis ki juz-o-kul pe nazar

na kar sake koi gungir karobar mein luT

jahan mein hoti hai ehsan ki jaza ehsan

sawab nekiyon ke daur-e-iKHtiyar mein luT

'abas hai bund ka chuka agar ghaDe Dhalkae

hamesha naqd mein wara hai yan udhaar mein luT

kiye hain sheb ne sab jism ke qawa kamzor

shurua ho gai har samt is hisar mein luT

hujum-e-yas mein chhoD ai ummid kishwar-e-dil

hai qatl-e-am ka ghul shahr mein jawar mein luT

bane wo fateh-e-kaunain KHush ho tu jis se

ziyaada ganj-e-kawakib se ho shumar mein luT

dayar-e-dil mein hai phir dagh-e-ishq ka toDa

junun mata-e-hawas mausam-e-bahaar mein luT

bhari hai taza har ek sar mein shor-o-shar ki hawa

'ajab nahin jo mache bagh-e-rozgar mein luT

'habib' mashq-e-riyazat se kho ke zang-e-dui

maze visal ke har dam firaq-e-yar mein luT