gulon ka sina-figar kaisa rawish-rawish par ghubar kaisa

guloñ kā sīna-figār kaisā ravish-ravish par ġhubār kaisā

mire chaman ke muhāfizo ye nayā nizām-e-bahār kaisā

havā-e-bāda meñ talḳhiyoñ se gurez mumkin nahīñ hai hargiz

ye zindagānī meñ zindagānī kī kashmakash se farār kaisā

jo dil kī ThanDak bane hue the vahī diloñ ko jalā rahe haiñ

havā-e-gulshan ne bhar diyā hai guloñ meñ rang-e-sharār kaisā

jahāñ umīdoñ kī raushnī thī vahāñ ye hasrat kī zulmateñ kyoñ

jahāñ sunahre mahal khaḌe the vahāñ ye suunā mazār kaisā

nikal ke dāmān-e-gul se kāñToñ meñ DhūñDhte ho panāh 'rā'nā'

ye pyaar se nafrateñ haiñ kaisī ye nafratoñ se hai pyaar kaisā

gulon ka sina-figar kaisa rawish-rawish par ghubar kaisa

mere chaman ke muhafizo ye naya nizam-e-bahaar kaisa

hawa-e-baada mein talKHiyon se gurez mumkin nahin hai hargiz

ye zindagani mein zindagani ki kashmakash se farar kaisa

jo dil ki ThanDak bane hue the wahi dilon ko jala rahe hain

hawa-e-gulshan ne bhar diya hai gulon mein rang-e-sharar kaisa

jahan umidon ki raushni thi wahan ye hasrat ki zulmaten kyon

jahan sunahre mahal khaDe the wahan ye suna mazar kaisa

nikal ke daman-e-gul se kanTon mein DhunDhte ho panah 'ra'na'

ye pyar se nafraten hain kaisi ye nafraton se hai pyar kaisa