gulon ki chah mein tauhin-e-barg-o-bar na kar

guloñ kī chaah meñ tauhīn-e-barg-o-bār na kar

bhare chaman meñ ye sāmān-e-intishār na kar

ḳhizāñ riyāz-e-chaman hai ḳhizāñ gudāz-e-chaman

ḳhizāñ kā Dar ho to phir ḳhvāhish-e-bahār na kar

bas ek dil hai yahāñ vāqif-e-nasheb-o-farāz

vafā kī raah meñ rahbar kā intizār na kar

hujūm-e-ġham meñ tabassum kā khel dekh liyā

maiñ kah rahā thā mire ġham kā e'tibār na kar

kahā ye ishq se dār-o-salīb-e-zindāñ ne

majāl ho to mirī raah iḳhtiyār na kar

ye taaza taaza qafas kyā ḳhizāñ se kuchh kam haiñ

hujūm-e-gul hī se andāza-e-bahār na kar

nasīm-e-sub.h unheñ muskurā to lene de

abhī guloñ se koī zikr-e-nāgavār na kar

udhar har ek nazar meñ hai hasratoñ kā julūs

idhar ye hukm-e-hayā hai nigāheñ chaar na kar

ye pūchhnā hai kisī din janāb-e-'zaidī' se

ki aap ne to kahā thā kisī se pyaar na kar

gulon ki chah mein tauhin-e-barg-o-bar na kar

bhare chaman mein ye saman-e-intishaar na kar

KHizan riyaz-e-chaman hai KHizan gudaz-e-chaman

KHizan ka Dar ho to phir KHwahish-e-bahaar na kar

bas ek dil hai yahan waqif-e-nasheb-o-faraaz

wafa ki rah mein rahbar ka intizar na kar

hujum-e-gham mein tabassum ka khel dekh liya

main kah raha tha mere gham ka e'tibar na kar

kaha ye ishq se dar-o-salib-e-zindan ne

majal ho to meri rah iKHtiyar na kar

ye taza taza qafas kya KHizan se kuchh kam hain

hujum-e-gul hi se andaza-e-bahaar na kar

nasim-e-subh unhen muskura to lene de

abhi gulon se koi zikr-e-nagawar na kar

udhar har ek nazar mein hai hasraton ka julus

idhar ye hukm-e-haya hai nigahen chaar na kar

ye puchhna hai kisi din janab-e-'zaidi' se

ki aap ne to kaha tha kisi se pyar na kar