gulon ko shoala mizaji sikhai jati hai

guloñ ko sho.ala mizājī sikhā.ī jaatī hai

chaman kī aag chaman meñ lagā.ī jaatī hai

junūn-e-firqa-parastī are ma.āz-allāh

har ik qadam pe qayāmat uThā.ī jaatī hai

vo aag jis ne mire gulsitāñ ko phūñk diyā

nigāh-e-shaiḳh-o-barahman meñ paa.ī jaatī hai

hamīñ pe ḳhatm nahīñ kufr-e-ishq ai nāseh

butoñ ke saath ḳhudā kī ḳhudā.ī jaatī hai

nahīñ ye ġham ki rasā nāla-e-hazīñ na hue

falak pe aaj mirī nā-rasā.ī jaatī hai

ab un ke qaul-o-qasam par nahīñ hai dil ko yaqīñ

sitamgaroñ se kahīñ bevafā.ī jaatī hai

in āñsuoñ ko na kar rā.egāñ are nādāñ

kahīñ ye daulat-e-ġham yuuñ luTā.ī jaatī hai

mafar shamātat-e-ham-sāya se 'jamāl' nahīñ

ye barq girtī nahīñ hai girā.ī jaatī hai

gulon ko shoala mizaji sikhai jati hai

chaman ki aag chaman mein lagai jati hai

junun-e-firqa-parasti are maaz-allah

har ek qadam pe qayamat uThai jati hai

wo aag jis ne mere gulsitan ko phunk diya

nigah-e-shaiKH-o-barahman mein pai jati hai

hamin pe KHatm nahin kufr-e-ishq ai naseh

buton ke sath KHuda ki KHudai jati hai

nahin ye gham ki rasa nala-e-hazin na hue

falak pe aaj meri na-rasai jati hai

ab un ke qaul-o-qasam par nahin hai dil ko yaqin

sitamgaron se kahin bewafai jati hai

in aansuon ko na kar raegan are nadan

kahin ye daulat-e-gham yun luTai jati hai

mafar shamatat-e-ham-saya se 'jamal' nahin

ye barq girti nahin hai girai jati hai