gulon ko tazgi taron ko tu ne dilkashi de di

guloñ ko tāzgī tāroñ ko tū ne dilkashī de dī

mire dil kī kalī ko jaane kyoñ afsurdagī diidī

ba-qadr-e-zarf us ne āgahī-o-gumrahī de dī

ḳhudī de dī kisī ko aur kisī ko be-ḳhudī de dī

zamāna kuchh kahe ai dost lekin shukriya terā

koī to maslahat thī jo mujhe dīvāngī de dī

mirī nākāmiyāñ hī kaam aa.iiñ rāh-e-ulfat meñ

ġhubār-e-kārvāñ ne himmat-e-manzil-rasī de dī

na pūchh ai ham-nashīñ āzurda-e-anjām-e-ishrat ho

ġham is kā kar rahā huuñ us ne kyoñ mujh ko ḳhushī de dī

kisī kī pursish-e-ḳhāmosh bhī ik husn-e-pursish thā

ki jis ne phir hamārī zindagī ko zindagī de dī

haqīqat meñ junūn-e-ishq me.arāj-e-mohabbat hai

use sab kuchh diyā tū ne jise dīvāngī de dī

dam-e-āḳhir jo dam bhar ko chale aaoge bālīñ par

to ye samjhūñgā maiñ lākhoñ baras kī zindagī de dī

zarūrat iltijāoñ kī na hājat hai duāoñ kī

'shifā' ġham kyā diyā us ne masarrat dā.imī de dī

gulon ko tazgi taron ko tu ne dilkashi de di

mere dil ki kali ko jaane kyon afsurdagi didi

ba-qadr-e-zarf us ne aagahi-o-gumrahi de di

KHudi de di kisi ko aur kisi ko be-KHudi de di

zamana kuchh kahe ai dost lekin shukriya tera

koi to maslahat thi jo mujhe diwangi de di

meri nakaamiyan hi kaam aain rah-e-ulfat mein

ghubar-e-karwan ne himmat-e-manzil-rasi de di

na puchh ai ham-nashin aazurda-e-anjam-e-ishrat ho

gham is ka kar raha hun us ne kyon mujh ko KHushi de di

kisi ki pursish-e-KHamosh bhi ek husn-e-pursish tha

ki jis ne phir hamari zindagi ko zindagi de di

haqiqat mein junun-e-ishq mearaj-e-mohabbat hai

use sab kuchh diya tu ne jise diwangi de di

dam-e-aKHir jo dam bhar ko chale aaoge baalin par

to ye samjhunga main lakhon baras ki zindagi de di

zarurat iltijaon ki na hajat hai duaon ki

'shifa' gham kya diya us ne masarrat daimi de di