gulon pe KHak-e-mehan ke siwa kuchh aur nahin

guloñ pe ḳhāk-e-mehan ke sivā kuchh aur nahīñ

chaman meñ yād-e-chaman ke sivā kuchh aur nahīñ

kahāñ kī manzil-e-rañgīñ sahar to hone do

hamāre ḳhvāb thakan ke sivā kuchh aur nahīñ

ye shām-e-ġhurbat-e-dil hai yahāñ charāġh kahāñ

ḳhayāl-e-sub.h-e-vatan ke sivā kuchh aur nahīñ

nigāh-e-shauq-e-musalsal usī ko chheḌe jā

jabīñ pe jis kī shikan ke sivā kuchh aur nahīñ

dayār-e-ishq meñ tum kyuuñ khaḌe ho ahl-e-havas

yahāñ to dār-o-rasan ke sivā kuchh aur nahīñ

savād-e-shām-e-ḳhizāñ hai to ho hameñ kyā ġham

nazar meñ sub.h-e-chaman ke sivā kuchh aur nahīñ

kare talāsh junūñ zulmat-e-ḳhirad se kaho

junūñ kiran hai kiran ke sivā kuchh aur nahīñ

hamārī naġhma-sarā.ī ke vāste 'darshan'

havā-e-gañg-o-jaman ke sivā kuchh aur nahīñ

gulon pe KHak-e-mehan ke siwa kuchh aur nahin

chaman mein yaad-e-chaman ke siwa kuchh aur nahin

kahan ki manzil-e-rangin sahar to hone do

hamare KHwab thakan ke siwa kuchh aur nahin

ye sham-e-ghurbat-e-dil hai yahan charagh kahan

KHayal-e-subh-e-watan ke siwa kuchh aur nahin

nigah-e-shauq-e-musalsal usi ko chheDe ja

jabin pe jis ki shikan ke siwa kuchh aur nahin

dayar-e-ishq mein tum kyun khaDe ho ahl-e-hawas

yahan to dar-o-rasan ke siwa kuchh aur nahin

sawad-e-sham-e-KHizan hai to ho hamein kya gham

nazar mein subh-e-chaman ke siwa kuchh aur nahin

kare talash junun zulmat-e-KHirad se kaho

junun kiran hai kiran ke siwa kuchh aur nahin

hamari naghma-sarai ke waste 'darshan'

hawa-e-gang-o-jaman ke siwa kuchh aur nahin