gulon se ishq gulistan se pyar karte rahe

guloñ se ishq gulistāñ se pyaar karte rahe

bharī ḳhizāñ meñ bhī zikr-e-bahār karte rahe

hamārī be-ḳhudī-e-shauq kī na pūchho ki ham

tire qarīb tirā intizār karte rahe

kisī ke dast-e-hinā.ī kā aasrā le kar

hifāzat-e-ġham-e-lail-o-nahār karte rahe

zamāna yuuñ bhī kabhī apne saath chal na sakā

magar zamāne kā ham e.atibār karte rahe

tumhārī yaad se vābasta talḳhiyāñ hī rahīñ

tumhārā zikr magar baar baar karte rahe

baḌe salīqe se pahuñche haiñ aaj manzil par

jo terī rāhguzar iḳhtiyār karte rahe

ġhazal kī aaḌ meñ 'hasrat' ġhazal ke saudā.ī

ḳhud apne dāġh-e-jigar āshkār karte rahe

gulon se ishq gulistan se pyar karte rahe

bhari KHizan mein bhi zikr-e-bahaar karte rahe

hamari be-KHudi-e-shauq ki na puchho ki hum

tere qarib tera intizar karte rahe

kisi ke dast-e-hinai ka aasra le kar

hifazat-e-gham-e-lail-o-nahaar karte rahe

zamana yun bhi kabhi apne sath chal na saka

magar zamane ka hum eatibar karte rahe

tumhaari yaad se wabasta talKHiyan hi rahin

tumhaara zikr magar bar bar karte rahe

baDe saliqe se pahunche hain aaj manzil par

jo teri rahguzar iKHtiyar karte rahe

ghazal ki aaD mein 'hasrat' ghazal ke saudai

KHud apne dagh-e-jigar aashkar karte rahe