گلوں سے عشق گلستاں سے پیار کرتے رہے

گلوں سے عشق گلستاں سے پیار کرتے رہے

بھری خزاں میں بھی ذکر بہار کرتے رہے

ہماری بے خودیٔ شوق کی نہ پوچھو کہ ہم

ترے قریب ترا انتظار کرتے رہے

کسی کے دست حنائی کا آسرا لے کر

حفاظت غم لیل و نہار کرتے رہے

زمانہ یوں بھی کبھی اپنے ساتھ چل نہ سکا

مگر زمانے کا ہم اعتبار کرتے رہے

تمہاری یاد سے وابستہ تلخیاں ہی رہیں

تمہارا ذکر مگر بار بار کرتے رہے

بڑے سلیقے سے پہنچے ہیں آج منزل پر

جو تیری راہ گزر اختیار کرتے رہے

غزل کی آڑ میں حسرتؔ غزل کے سودائی

خود اپنے داغ جگر آشکار کرتے رہے