gulshan ke gul hain chaak-e-gareban tere baghair

gulshan ke gul haiñ chāk-e-garebāñ tire baġhair

ujḌī huī hai bazm-e-gulistāñ tire baġhair

aa jā ki merā dil hai pareshāñ tire baġhair

phir chashm-e-intizār hai giryāñ tire baġhair

be-kaif zindagī hai to har har nafas hai baar

hogā na dil mirā kabhī ḳhandāñ tire baġhair

mamnūn-e-iltifāt huuñ ai jazb-e-dil tirā

paatā hai kaun manzil-e-irfāñ tire baġhair

ai daur-e-inqilāb koī aur inqalāb

bhātī nahīñ bahār-e-gulistāñ tire baġhair

zulmat-kade meñ dil ke mire ai ġham-e-habīb

raushan huī na sham-e-farozāñ tire baġhair

mastī bharī nigāh se saaqī pilā sharāb

be-kaif sī hai mahfil-e-rindāñ tire baġhair

'aslam' ko shikva-e-ġham-e-daurāñ na ho magar

miltā nahīñ sukūñ ġham-e-jānāñ tire baġhair

gulshan ke gul hain chaak-e-gareban tere baghair

ujDi hui hai bazm-e-gulistan tere baghair

aa ja ki mera dil hai pareshan tere baghair

phir chashm-e-intizar hai giryan tere baghair

be-kaif zindagi hai to har har nafas hai bar

hoga na dil mera kabhi KHandan tere baghair

mamnun-e-iltifat hun ai jazb-e-dil tera

pata hai kaun manzil-e-irfan tere baghair

ai daur-e-inqilab koi aur inqalab

bhati nahin bahaar-e-gulistan tere baghair

zulmat-kade mein dil ke mere ai gham-e-habib

raushan hui na sham-e-farozan tere baghair

masti bhari nigah se saqi pila sharab

be-kaif si hai mahfil-e-rindan tere baghair

'aslam' ko shikwa-e-gham-e-dauran na ho magar

milta nahin sukun gham-e-jaanan tere baghair