gulshan ki faqat phulon se nahin kanTon se bhi zinat hoti hai

gulshan kī faqat phūloñ se nahīñ kāñToñ se bhī zīnat hotī hai

jiine ke liye is duniyā meñ ġham kī bhī zarūrat hotī hai

har shām-o-sahar qurbāñ jis par duniyā-e-masarrat hotī hai

vo paikar-e-rāhat kyā jaane kaisī shab-e-furqat hotī hai

ai vā.iz-e-nādān kartā hai tū ek qayāmat kā charchā

yaañ roz nigāheñ miltī haiñ yaañ roz qayāmat hotī hai

karnā hī paḌegā zabt-e-alam piine hī paḌeñge ye aañsū

fariyād-o-fuġhāñ se ai nādāñ tauhīn-e-mohabbat hotī hai

vo pursish-e-ġham ko aa.e haiñ kuchh kah na sakūñ chup rah na sakūñ

ḳhāmosh rahūñ to mushkil hai kah duuñ to shikāyat hotī hai

ai dost judā.ī meñ terī kuchh aise bhī lamhe aate haiñ

sejoñ pe bhī taḌpā kartā huuñ kāñToñ pe bhī rāhat hotī hai

jo aa ke ruke dāman pe 'sabā' vo ashk nahīñ hai paanī hai

jo ashk na chhalke āñkhoñ se us ashk kī qīmat hotī hai

gulshan ki faqat phulon se nahin kanTon se bhi zinat hoti hai

jine ke liye is duniya mein gham ki bhi zarurat hoti hai

har sham-o-sahar qurban jis par duniya-e-masarrat hoti hai

wo paikar-e-rahat kya jaane kaisi shab-e-furqat hoti hai

ai waiz-e-nadan karta hai tu ek qayamat ka charcha

yan roz nigahen milti hain yan roz qayamat hoti hai

karna hi paDega zabt-e-alam pine hi paDenge ye aansu

fariyaad-o-fughan se ai nadan tauhin-e-mohabbat hoti hai

wo pursish-e-gham ko aae hain kuchh kah na sakun chup rah na sakun

KHamosh rahun to mushkil hai kah dun to shikayat hoti hai

ai dost judai mein teri kuchh aise bhi lamhe aate hain

sejon pe bhi taDpa karta hun kanTon pe bhi rahat hoti hai

jo aa ke ruke daman pe 'saba' wo ashk nahin hai pani hai

jo ashk na chhalke aankhon se us ashk ki qimat hoti hai