gulshan mein junun ka mujhe saman nazar aaya

gulshan meñ junūñ kā mujhe sāmāñ nazar aayā

jo phuul khilā chāk-garebāñ nazar aayā

har shai meñ tirā husn-e-daraḳhshāñ nazar aayā

jis chiiz ko dekhā mah-e-tābāñ nazar aayā

jis ne use dekhā vo giraftār-e-balā thā

tasvīr kā ā.īna bhī hairāñ nazar aayā

yārab koī had bhī hai pareshān-nazar kī

furqat meñ chaman mujh ko bayābāñ nazar aayā

gulshan meñ khile gul to havā chal ga.ī aisī

sābit na kisī kā bhī garebāñ nazar aayā

ā.īne meñ kyā dekh liyā kaun batā.e

zulfoñ kī tarah ḳhud vo pareshāñ nazar aayā

phir tuur pe jaane kī zarūrat hameñ kyā thī

jab aañkh uThī jalva-e-jānāñ nazar aayā

tāsīr na.ī fasl-e-bahārāñ meñ ye dekhī

dāman kī jagah ham ko garebāñ nazar aayā

ai ishq bahut tū ne to dekhā hai zamāna

mujh sā bhī koī be-sar-o-sāmāñ nazar aayā

hai husn kī sarkār meñ tausīf vafā kī

vo kahte haiñ 'shankar' hameñ insāñ nazar aayā

gulshan mein junun ka mujhe saman nazar aaya

jo phul khila chaak-gareban nazar aaya

har shai mein tera husn-e-daraKHshan nazar aaya

jis chiz ko dekha mah-e-taban nazar aaya

jis ne use dekha wo giraftar-e-bala tha

taswir ka aaina bhi hairan nazar aaya

yarab koi had bhi hai pareshan-nazar ki

furqat mein chaman mujh ko bayaban nazar aaya

gulshan mein khile gul to hawa chal gai aisi

sabit na kisi ka bhi gareban nazar aaya

aaine mein kya dekh liya kaun batae

zulfon ki tarah KHud wo pareshan nazar aaya

phir tur pe jaane ki zarurat hamein kya thi

jab aankh uThi jalwa-e-jaanan nazar aaya

tasir nai fasl-e-bahaaran mein ye dekhi

daman ki jagah hum ko gareban nazar aaya

ai ishq bahut tu ne to dekha hai zamana

mujh sa bhi koi be-sar-o-saman nazar aaya

hai husn ki sarkar mein tausif wafa ki

wo kahte hain 'shankar' hamein insan nazar aaya