gulshan mein kabhi hum sunte the wo kya tha zamana phulon ka

gulshan meñ kabhī ham sunte the vo kyā thā zamāna phūloñ kā

kaliyoñ se kahānī kaliyoñ kī phūloñ se fasāna phūloñ kā

kyā mausam-e-gul par itrā kar ham gaa.eñ tarāna phūloñ kā

do roz meñ aane vaalā hai ik roz zamāna phūloñ kā

ayyām-e-ḳhizāñ meñ ahl-e-chaman sarsar ko sitam se kyā rokeñ

begāna huā jab sabza bhī to kaun yagāna phūloñ kā

phir bād-e-sabā vo aa pahuñchī phir rañg khilā nik.hat phailī

ai lūTne vaalo ab luuTo ma.amūr ḳhazāna phūloñ kā

nāzāñ hai jo apnī qismat par gulchīñ ko ye kyā ma.alūm nahīñ

jā.egī bahār aa.egī ḳhizāñ badlegā zamāna phūloñ kā

gulchīñ se kabhī maiñ suntā huuñ bulbul se kabhī maiñ kahtā huuñ

is dard-sarī kā baa.is hai dilchasp fasāna phūloñ kā

shāḳheñ bhī balā.eñ letī haiñ patte bhī nichhāvar hote haiñ

allāh re javānī gulshan kī uf uf re zamāna phūloñ kā

ayyām-e-ḳhizāñ meñ ai bulbul taklīf bahut baḌh jā.egī

phūloñ kī qasam detā huuñ tujhe chheḌ ab na tarāna phūloñ kā

jab ahl-e-chaman so jaate haiñ to husn ke Daakū aate haiñ

kuchh raat ga.e kuchh raat rahe luTtā hai ḳhazāna phūloñ kā

murġhān-e-qafas ko niiñd kahāñ niiñd aa.e yahī ummīd kahāñ

gulchīñ se unheñ sunvātā hai sayyād fasāna phūloñ kā

kyā zikr-e-chaman kyā fikr-e-chaman kyā zauq-e-chaman kyā shauq-e-chaman

dāġhoñ se hamārā ḳhāna-e-dil hai daulat-ḳhāna phūloñ kā

kyā ḳhuub milī gul khāne kī ye daad hameñ mar jaane par

phūloñ meñ hamāre chheḌ diyā bulbul ne tarāna phūloñ kā

fitrat ke musāfir ko bas meñ rakh sakte nahīñ ashjār-e-chaman

aatā hai zamāna phūloñ kā jaatā hai zamāna phūloñ kā

ai 'nūh' asar itnā to kiyā tum par bhī chaman ke manzar ne

tūfān uThānā bhuul ga.e le baiThe fasāna phūloñ kā

gulshan mein kabhi hum sunte the wo kya tha zamana phulon ka

kaliyon se kahani kaliyon ki phulon se fasana phulon ka

kya mausam-e-gul par itra kar hum gaen tarana phulon ka

do roz mein aane wala hai ek roz zamana phulon ka

ayyam-e-KHizan mein ahl-e-chaman sarsar ko sitam se kya roken

begana hua jab sabza bhi to kaun yagana phulon ka

phir baad-e-saba wo aa pahunchi phir rang khila nikhat phaili

ai luTne walo ab luTo mamur KHazana phulon ka

nazan hai jo apni qismat par gulchin ko ye kya malum nahin

jaegi bahaar aaegi KHizan badlega zamana phulon ka

gulchin se kabhi main sunta hun bulbul se kabhi main kahta hun

is dard-sari ka bais hai dilchasp fasana phulon ka

shaKHen bhi balaen leti hain patte bhi nichhawar hote hain

allah re jawani gulshan ki uf uf re zamana phulon ka

ayyam-e-KHizan mein ai bulbul taklif bahut baDh jaegi

phulon ki qasam deta hun tujhe chheD ab na tarana phulon ka

jab ahl-e-chaman so jate hain to husn ke Daku aate hain

kuchh raat gae kuchh raat rahe luTta hai KHazana phulon ka

murghan-e-qafas ko nind kahan nind aae yahi ummid kahan

gulchin se unhen sunwata hai sayyaad fasana phulon ka

kya zikr-e-chaman kya fikr-e-chaman kya zauq-e-chaman kya shauq-e-chaman

daghon se hamara KHana-e-dil hai daulat-KHana phulon ka

kya KHub mili gul khane ki ye dad hamein mar jaane par

phulon mein hamare chheD diya bulbul ne tarana phulon ka

fitrat ke musafir ko bas mein rakh sakte nahin ashjar-e-chaman

aata hai zamana phulon ka jata hai zamana phulon ka

ai 'nuh' asar itna to kiya tum par bhi chaman ke manzar ne

tufan uThana bhul gae le baiThe fasana phulon ka