gulshan mein koi chaak-e-gareban bhi nahin hai

gulshan meñ koī chāk-e-garebāñ bhī nahīñ hai

aur fasl-e-bahār aane kā imkāñ bhī nahīñ hai

ham naqd-e-dil-o-jāñ bhī luTā aa.e sar-e-bazm

aur aap pe is kā koī ehsāñ bhī nahīñ hai

kis muñh se kare tere taġhāful kī shikāyat

jis par karam-e-gardish-e-daurāñ bhī nahīñ hai

pūchhe jo koī haal to kyā haal batā.e

vo shaḳhs jo kuchh din se pareshāñ bhī nahīñ hai

vo dard mayassar hai to kyā chāhiye 'nashtar'

vo dard ki jis kā koī darmāñ bhī nahīñ hai

gulshan mein koi chaak-e-gareban bhi nahin hai

aur fasl-e-bahaar aane ka imkan bhi nahin hai

hum naqd-e-dil-o-jaan bhi luTa aae sar-e-bazm

aur aap pe is ka koi ehsan bhi nahin hai

kis munh se kare tere taghaful ki shikayat

jis par karam-e-gardish-e-dauran bhi nahin hai

puchhe jo koi haal to kya haal batae

wo shaKHs jo kuchh din se pareshan bhi nahin hai

wo dard mayassar hai to kya chahiye 'nashtar'

wo dard ki jis ka koi darman bhi nahin hai