gulshan mein rang-o-nur ke paikar mein kaun hai

gulshan meñ rang-o-nūr ke paikar meñ kaun hai

ḳhushbū meñ koñpaloñ meñ gul-e-tar meñ kaun hai

ye kaun sā maqām hai ḳhidmat kā ai ḳhudā

jārūb-kash ye ḳhāna-e-be-zar meñ kaun hai

maujeñ taḌap rahī haiñ kināre haiñ zer-e-āb

mazlūm ab jahān-e-samundar meñ kaun hai

qaa.em tujhī se jab ki urūj-o-zavāl hai

ai vaqt tū hī bol ki chakkar meñ kaun hai

nazroñ kī sīḌhiyoñ se utartā hai dil meñ kaun

ḳhushbū kī tarah ruuh ke paikar meñ kaun hai

'muḳhlis' tum us kā naam batāte nahīñ ho kyoñ

bartar hai ham meñ kaun barābar meñ kaun hai

gulshan mein rang-o-nur ke paikar mein kaun hai

KHushbu mein konpalon mein gul-e-tar mein kaun hai

ye kaun sa maqam hai KHidmat ka ai KHuda

jarub-kash ye KHana-e-be-zar mein kaun hai

maujen taDap rahi hain kinare hain zer-e-ab

mazlum ab jahan-e-samundar mein kaun hai

qaem tujhi se jab ki uruj-o-zawal hai

ai waqt tu hi bol ki chakkar mein kaun hai

nazron ki siDhiyon se utarta hai dil mein kaun

KHushbu ki tarah ruh ke paikar mein kaun hai

'muKHlis' tum us ka nam batate nahin ho kyon

bartar hai hum mein kaun barabar mein kaun hai